Яңа ел бәйрәмнәрендә нинди фильмнарны яратып карыйсыз?

- Әлбәттә, «Ирония судьбы, или с легким паром». Фильмның исеме үк елмаерга мәҗбүр итә һәм сагыну хисләре уята. Күбесе, миңа калса, 31 декабрьне шушы картинадан башка күз алдына да китерә алмый. «Три орешка для Золушки», «12 месяцев» фильмнары да миндә яңа ел кәефе тудыра. Мин аларны инде ничәмә ничә тапкыр карадым, әмма барыбер шушы әкияти мохиткә күңел тартыла. Ничә яшьтә булуыңа карамастан, могҗизага ышанасы килә.

- Яңа елны каршы алуны «Ирония судьбы, или с легким паром» фильмыннан башка күз алдына китерүе авыр. Ул элек-электән үк яңа ел бәйрәмнәрендә барлык телеканаллар программасында иң яхшы фильмнарның берсе. Ә «Снежная королева», «Морозко», «Вечера близ хутора Диканьки» кебек нәфис һәм мультипликацион фильм-әкиятләр үзләре ни тора?! Миңа «Елки» дигән заманча фильм да ошый. Гомумән, яңа ел могҗизасы белән бәйле барлык фильмнарны яратып карыйм. Кешегә яхшыга өметләнү, уңай якка үзгәрешләр көтү хас.

- Дөресен генә әйткәндә, шушы көннәрдә телевизор карарга вакыт юк, сессия: зачетлар, имтиханнар тапшыру бара. Әмма вакыт булса, «Один дома» фильмының беренче ике өлешен кабат карар идем. Фильмдагы бәйрәм атмосферасына кереп китәсең, барысы да шундый матур итеп эшләнгән!

- Яңа елны көтү һәрвакыт шатлыклы мәшәкатьләр белән уза. Бәйрәм табынына салатлар әзерлисең, ә бу вакытта телевизордан яраткан картиналарны күрсәтәләр. «Ирония судьбы...», «Чародеи» фильмнарын карап кабат хозурланасың. Бүгенге эшләрдән, мәсәлән, «Мама» фильмы яңа ел кәефе тудыра.

- Кыш бабай, Кар кызы һәм башка әкияти геройлар булган мультфильм­нарны яратам. Герда һәм Кай турындагы фильм (малай аның исемен җитди кыяфәт белән искә төшерә) ошый. Ә, искә төште! «Снежная королева»! Яңа елны шулай ук кышкы каникуллардан башка күз алдына китереп булмый!