Чистай хэбэрлэре
  • Рус Тат
  • Торак-коммуналь хезмәтләр өчен яңа тарифларга этаплап күчәбез

    1 июльдән торак һәм коммуналь хезмәтләр өчен тарифлар күтәрелә. Быел күтәрелүнең үзенчәлеге шунда ки, тарифлар бер тапкыр түгел, ә ике тапкыр 1 июльдән һәм 1 сентябрьдән арттырылачак. Торак-коммуналь хезмәтләр буенча исәп-хисап үзәге директоры Светлана Терентьевадан әлеге хәлгә аңлатма бирүен сорадык.

    - Гадәттә торак һәм коммуналь хезмәтләргә тарифлар бер юлы тулы календарь елга арттырыла иде. Бу юлы аларны берьюлы түгел, ә акрынлап әлеге чараның нәтиҗәлелеген карап арттырырга дигән карар кабул ителде. Шундый хезмәтләр күрсәтүче торак-коммуналь хуҗалык предприятиеләренә тарифны бервакытта күтәрү белән эшләү уңайлырак, ә менә хезмәтләрдән файдаланучы яшәүчеләр өчен берьюлы түгел, ә акрынлап түләү уңайлы. Шуңа да РФ Хөкүмәте шундый карар кабул итте. Безнең Чистай муниципаль районында торак-коммуналь хуҗалык хезмәтләренә тарифлар шәһәрдә һәм районда берникадәр аерылачак, дөрес, күпкә түгел. Биредә шәһәр һәм авыл җирлекләренең үзенчәлеге үз ролен уйнады.
    Электр энергиясеннән башлыйк. Әгәр шәһәрдә 1 квт/сәг. өчен 2 сум 57 тиен булачак, ул 1 сентябрьдән дә шулай кала, ә авыл җирлекләрендә ул 1 квт/сәг. өчен 1,8 сум булачак. Әгәр шәһәрдә 1 кубометр салкын суның бәясе 1 июльдән 24,27 сум булса, 1 сентябрьдән 26 сум булачак, ә районда салкын су өчен тарифлар ике срокта да 26 сумга төшә, ә менә шәһәр халкы да, район халкы да канализация өчен бер төсле түләячәк: 1 июльдән 26,26 сум, ә 1 сентябрьдән 28,34 сум. Җылылык бирү буенча тарифлар шәһәрдә дә, районда да бер төсле. Шәһәрдә дә, районда да 1 июльдән 1 гигакалориянең бәясе 1512,23 сум, 1 сентябрьдән 1520,39 сум тәшкил итәчәк. Шәһәрдә җылылык энергиясен кулланучылар башка куючыдан бәйле булу сәбәпле, күбрәк яки азрак түләячәкләр.
    Торак хезмәтләр өчен тарифлар бары бер тапкыр - 1 июльдән генә артачак. Шәһәрдә дә, авыл җирлекләрендә кайбер тарифлар элеккечә калды: капиталь ремонт буенча торак мәйданның 1 кв.метры өчен, торак бина наймы (наймга алучылар өчен), дератизация (дезинсекция). Чистайда "торак фонд белән идарә итү" графасы буенча тариф районныкыннан югарырак булачак. Уртача тарифлар бары 7 процентка гына күтәрелә. Мәсәлән, каты көнкүреш калдыкларын җыю, чыгару, утильләштерү шәһәрдә дә, авыл җирлекләрендә дә бер кешегә 27,9 сум тәшкил итәчәк. 1 июльдән йортта лифтны карап торган өчен 1 кешедән бер айга 128,5 сум акча алыначак. Әгәр шәһәрдә һәм районда "торак бинаны ремонтлау һәм территорияне төзекләндерү" графасы буенча яшәүчеләр 1 июльдән гомуми мәйданның 1 кв.метры өчен 2,44 сум түләячәкләр, ә менә "йорт алды территориясен җыештыру (шул исәптән контейнер мәйданчыкларын җыештыру)" графасы буенча бары шәһәрлеләр генә түләячәк. Авыл халкында счет-квитанцияләрдә әлеге графа юк. Шәһәр һәм авыл халкын сораштырулардан күренгәнчә, тарифларны акрынлап күтәрү кешеләрнең гаилә бюджетында әллә ни сизелерлек булмый, хәзер киләчәктә дә әлеге тәҗрибәне куллану мәсьәләсе карала.
    Нравится
    Поделиться:
    Реклама
    Комментарии (0)
    Осталось символов: