Чистай-информ
  • Рус Тат
  • Стефан Федосов – барыннан да яхшырак!

    Төп чистайлыларның уллары, дүрт яшьлек Стефан Федосов хәзер Беренче канал йолдызы!

    Максим Галкин алып барган «Лучше всех» тапшыруында катнашты.

    Стефан Федосов дүрт яшендә берьюлы ике: рус һәм инглиз телләрендә кушарга, алырга, тапкырларга һәм бүләргә өйрәнгән. Гаҗәп, чөнки һәр укучы гына түгел, ә өлкән кеше дә мондый уңышлары белән мактана алмый. Малайның математиканы мөстәкыйль рәвештә диярлек өйрәнүе тагын да сок ландыра.

    Стефан белән без агымдагы елның апрелендә танышырга өлгергән идек инде. Үзенең математикага сәләтен ул әти-әнисенең туган ягына кайткач, Чистайның 2нче номерлы лицеенда күрсәтте. Талантлы малай төрле мисаллар чиште, инглиз телендә бирелгән сорауларга җавап бирде. Ул чакта аның әнисе Стефан белән алда планнары күп, алар турында бары аларны тормышка ашырганнан соң гына сөйләргә әзер булуын әйткән иде. Һәм менә без яшь математикның илебезнең иң популяр тапшыруларының берсендә катнашуын белдек.

    – Барысы да җиңел һәм тиз килеп чыкты. Кастинг турында мәгълүматны күргәч, Стефанның рус лотосы ярдәмендә мисаллар эшләве турында өйдә төшерелгән видеоны җибәрдек, икенче көнне аның белән онлайн-кастинг үткәрделәр һәм уңай җавап бирделәр. Берничә көннән соң безне тапшыруда төшәргә чакырдылар, бер атнадан соң ул эфирга чыкты. Номер «Рус лотосы» стилендә куелды, Стефанга бик ошады. Бу гаиләнең барлык әгъзалары, беренче чиратта Стефан өчен кызыклы һәм истә калырлык вакыйга булды, – дип сөйли малайның крестные Марина Симакова.

    Чын калькулятор кебек, Стефан берничә секунд эчендә төрле мисалларны чиште: кушты, алды, тапкырлады, бүлде. Аның супер сәләтен бөтен ил күзәтте. Сәхнәдә зур лотерея билеты проектланды, ә янәшәдә генә төрле сандагы кечкенә мичкәләр торды, алар арасында билгеле бер математик бирем белән билет шакмагын ябу өчен дөрес җавап сайларга кирәк иде. Стефан биремне берничә минут эчендә башкарып чыкты.

    Дүрт яшьлек малай Максим Галкин белән башка темаларга да аралашты. Кем булырга телисең дигән сорауга, полицейский дип җавап бирде. Шулай ук аңа көч биреп торырга килгән якыннары белән дә таныштырды. Тамашачылар залында аның өчен әнисе, бабасы, крестные, апалары җан атты. Очрашуның кульминациясе – Стефанга «Барыннан да яхшырак» медален тапшыру булды.

    – Аннан башка миңа моңсу иде, ә хәзер күңелле, – ди малай.

    Без Стефан өчен чын күңелдән шатбыз һәм аңа киләчәктә дә уңышлар, яңа үрләр яулавын телибез!

    Район тормышына кагылышлы иң мөһим яңалыкларыбызны «Чистополь-информ» Telegram-каналыбызда да укыгыз

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: