Чистай-информ
  • Рус Тат
  • «Ни өчен без нәрсәдер исбат итәргә тиеш?!» 

     Хат эзеннән 

     Безнең газета редакциясенә безнең шәһәрдә яшәүчедән хат килде. Әлеге хатның һәр юлы килеп туган проблема турында сөйли сыман... Әлеге хат авторы күп кенә шәһәрлеләр өчен актуаль булган теманы кузгаткан. Әлеге хәлне уйлап, дөрес итеп хәл итәсе иде.

     – «Күптән түгел мин «Чистай хәбәрләре»нең 27 март санында тасвирланган хәлдә калдым. Чүп чыгарган өчен квитанция килде, әмма йорт әле төзелмәгән, – дип сөйли билгесез калырга теләгән ханым.

     – Эш шунда ки, теге язма герое кебек үк, без дә берничә елдан бирле шәһәр читендә төзелеп ятучы йорт өчен квитанция алдык. Анда өч меңнән артык суммага бурыч күрсәтелгән иде! Күрсәтелмәгән хезмәтләре өчен безне ике тапкыр түләргә мәҗбүр иттеләр, чөнки гаилә башка адрес буенча теркәлгән!

     Безнең зур гаиләбез ничек кенә авыр шартларда калмасын, бурычлы булып яшисебез килми. Шуңа күрә бу хәлне кичекмәстән хәл итү сорала, чөнки бурыч ай саен үсә генә барачак бит!

     Әмма бүлек начальнигы – Чистай һәм Чистай районы буенча халыкка хезмәт күрсәтү офисы җитәкчесе Татьяна Тишинаның җавабы, әйтергә кирәк, безне авыр хәлгә калдырды. Җир участогына электр энергиясе тоташтырылган икән, аларга чүп чыгарган өчен түләүләр автоматик рәвештә исәпләнә булып чыкты. Андый хуҗалар, минем уйлавымча, бик күп.

     Татьяна Тишина исә йортның эксплуатациягә бирелмәве, анда беркемнең дә яшәмәве яисә ялгыш исәпләүләр булган очракта түләргә кирәкмәве турында билгеләп үтә. Әмма Росреестр органнары биргән ЕГРН өземтәсен алып килергә кирәк!

     Ишегалдында 21 гасыр, бар җирдә заманча технологияләр хөкем сөрә. Бала әле дөньяга аваз салырга да өлгерми, фатирда яшәүче булып санала. Ә безгә белешмәләр ярдәмендә , кем әйтмешли, үзеңнең дөя түгеллеңне исбатларга тәкъдим итәләр. Күпме вакытыңны әрәм итәргә, өземтә өчен әле акча да түләргә кирәк! Кайбер хезмәтләрнең эшләре килештерелмичә эшләвенә кешеләр гаепле түгел бит! Абонентларга хезмәт күрсәтүгә килгән түләү кәгазьләрен яңадан карап, әлеге вәзгыятьне бары тиешле органнар гына хәл итә алачак. Үз эшеңне чистайлыларга сылтарга кирәкми!»

     Дөрестән дә, Чистайда шәхси йортлар торгызырга теләүчеләр күп. Әлбәттә, бу яхшы, алар ярдәмендә шәһәр үсә. Без аларның үтенечләренә колак салырлар дип ышанабыз. Иң мөһиме, алар кар өеме кебек җыелып ятмасыннар, аларны чишү юллары табылсын иде.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: