Иске асфальтка икенче тормыш
Чистайда иске асфальт юлның сыйфатын яхшыртуга китә.
Шәһәребезнең кайбер урамнарында язның соңгы көннәрендә асфальт барлыкка килде, дөрес, әлегә иске. "Алексеевскавтодор" фирмасы белгечләре шәһәрдәге юллардан иске асфальтны алдылар һәм кабат файдалану өчен өеп куйдылар. Чистайлылар чокыр-чакырларны ремонтлау барышыннан канәгать түгел, шуңа да шәһәр башкарма комитеты җитәкчелеге тарафыннан кисеп алынган асфальтны Чистай урамнарын төзекләндерү планында иң проблемалы урамнарга бүлеп бирү турында карар кабул ителде. Әлеге эш өчен ике җаваплы билгеләнде. Шәһәр башкарма комитеты хезмәтләре автомобиль хәрәкәте көчле булган урамнарга асфальт китерү, ә торак оешмалары быел объектив сәбәпләр буенча чокыр-чакырларны ремонтлау алып барылмаган шәһәр урамнарына һәм тыкрыкларына асфальт китерү өчен җаваплы.
- Без асфальт китерү өчен биш йөк төягечтән һәм 25 автомашинадан файдаландык, - дип сөйли шәһәр башкарма комитеты җитәкчесе урынбасары Ранас Нургатин.-Нәтиҗәдә, төзекләндерү өчен яраклы булган асфальт барлык шәһәр микрорайоннарында да күренәчәк. Каядыр аны урамнарда яшәүчеләр үзләре таратты (шәһәр башкарма комитеты белән килешү буенча), ә каядыр торакчылар эшләде.
Нәтиҗәдә, ике көндә Чистайның күп кенә урамнары төзекләндерелде. Болар - Пионерская, Базарная, Вахитов, Энгельс, Гафури, Тукай, Чехов, Пролетарская һәм башка урамнар, анда юл полотносында чокырлар сизелерлек кимеде.
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84