Чистайда «Алга! Киттек!» республика форумы узды
Безнең шәһәргә Татарстанның сигез районыннан катнашучылар җыелды
«Чистай» мәдәни үзәгендә «Алдынгылар хәрәкәте»ндә катнашучылар өчен менә дигән яшьләр вакыйгасы — «Алга! Киттек!» республика форумы узды. Безнең шәһәрдә ул икенче тапкыр уздырыла.
Актлар залында Татарстанның сигез районыннан: Аксубай, Алексеевск, Әлки, Яңа Чишмә, Түбән Кама, Нурлат, Спас һәм Чистайдан 272 катнашучы җыелды.
— Форумда катнашучыларны сәламлим! Бүген безгә бүләк иткән кәефегез һәм атмосферагыз өчен рәхмәт. Бүгенге форум сезгә берләшергә һәм яңа кешеләр белән танышырга мөмкинлек бирер дип ышанам. Уңышлар сезгә, — дип мөрәҗәгать итте егетләргә һәм кызларга башкарма комитет җитәкчесе Эдуард Хәсәнов. — Республика яшьләребезнең активы киләчәктә ил үсешенә ярдәм итәр дип өметләнәбез.
Аннары сәхнәгә район вәкилләре чыкты һәм яшьләр күңелне күтәрә торган бүләкләр: тәм-томнар, рәсемнәр, плакатлар, вакыйгалы календарьлар һәм башка бик күп нәрсәләр белән алмаштылар.
Гадәти булмаган бизәлеш форумга ямь өстәде, быел ул космонавтика стилендә узды.
Форумны ачу тантанасыннан соң өч белем бирү мәйданчыгы — «Космик очрашулар», «Киек каз юлы» һәм «Ачык космос» эшли башлады.
— Мәйданчыкларның берсендә — «Ачык космос»та җирле бүлекчәләр үзләренең видео роликларын — районда хәрәкәтне үстерү өчен әһәмиятле урыннарга экскурсияләр күрсәтергә һәм үзләрен иҗади рәвештә тәкъдим итәргә тиеш иделәр. Егетләр һәм кызлар бераз дулкынлана. Ләкин, миңа калса, һәр район үз үзенчәлеген тапкан һәм барлык катнашучылар да лаеклы чыгыш ясаячак, — диде «Алдынгылар хәрәкәте» Бөтенроссия балалар һәм яшьләр хәрәкәтенең җирле бүлекчәсе Советы рәисе Гүзәл Гатауллина. — Форумның үзенчәлеге шунда, балалар сүз белән аңлата алмаслык хис-кичерешләр алалар һәм яңа кешеләр белән танышалар, номерлар алмашалар, социаль челтәрләрдә аралашалар һәм бергә яңа, менә дигән проектлар уйлап табалар!
Форум «Алдынгылар командасы» республика премиясе нәтиҗәләре буенча бүләкләү тантанасы белән тәмамланды. Лауреатларны һәм җиңүчеләрне эксперт жюрие 6 номинация: «Россия белән булу», «Кеше булу», «Бергә булу», «Хәрәкәттә булу», «Алдынгылар булу» һәм «Җирле бүлекчә командасы» буенча билгеләде.
1нче гимназиянең «Бердәмлектә хәрәкәт» Чистай командасы «Бергә булу» номинациясендә җиңүче булды.
— Бүген без күп репетицияләр ясадык һәм бик арыдык. Әлегә кадәр беренче урынны алуыбызга һәм бу форумның нәкъ менә безнең шәһәрдә узуына ышана алмыйбыз, чөнки безнең өчен бу көтелмәгән вакыйга булды. Залдагы атмосфера бик ошады, барлык яшьләр дус һәм актив булдылар, үзләрен бер гаилә итеп хис иттеләр. Шәп булды! — диде командада катнашучыларның берсе Алия Шакирова.
— Бу номинациядә җиңү өчен без барысын бергә эшләдек. 15 минут эчендә видеобыз өчен идея уйлап таптык һәм барысын да 3 сәгать эчендә төшердек. Видеоролик бер-береңә ярдәм итүнең мөһимлеге турында иде, чөнки бары гомуми берләшү генә нәтиҗәгә китерәчәк. Безнең видеода без барыбыз бергә командабызның бер катнашучысына ярдәм иттек, — дип билгеләп үтте аның кулдашы Самирә Хөснуллина.
— Бүген без төрле районнардан килгән егетләрнең һәм кызларның бер-берсен кайгыртуларын, «Алдынгылар хәрәкәте»нә актив кушылуларын күрдек. Бу форум күп эшләр башкаручыларны — мактау, ә кемнедер яңа казанышларга илһамландыру өчен кирәк! — дип билгеләп үтте ТР Алдынгылар хәрәкәте рәисе урынбасары Алла Кондратьева. — Җиңү яуламасагыз да, өметсезлеккә бирелмәгез. Чөнки җиңелү сезнең иң яхшы укытучыгыз булырга мөмкин. Иң мөһиме, сезнең авыр минутларда ярдәмгә киләчәк командагыз бар.
«Алга! Киттек!» форумында Чистай районы нәтиҗәләре:
«Бергә булу» номинациясендә I урын — «Бердәмлектә хәрәкәт» командасы (1нче гимназия)
«Җирле бүлек командасы» номинациясендә Чистай районы I урынны алды.
Следите за самым важным и интересным в Telegram-каналеТатмедиа
Район тормышына кагылышлы иң мөһим яңалыкларыбызны «Чистополь-информ» Telegram-каналыбызда да укыгыз
Нет комментариев