Чистай районы башлыгы катнашында узган планеркада шау-шу кузгаткан үтерү, вакцинация, чәчү мәйданнары структурасы турында фикер алыштылар

Чистай районы башлыгы катнашында узган планеркада шау-шу кузгаткан үтерү, вакцинация, чәчү мәйданнары структурасы турында фикер алыштылар

Район башлыгы Дмитрий Иванов аны онлайн-режимда алып барды.

Профсоюзлар – хезмәт ияләре хокуклары сагында

Социаль партнерлыкны үстерү һәм хезмәткәрләрнең хезмәт хокукларын яклау буенча муниципаль район профсоюзлары оешмаларының координацион советы эше турында Чистай районы профсоюзлары оешмаларының координацион советы рәисе Наилә Нигъмәтуллина сөйләде.

Беренчел профсоюз оешмалары оештырган предприятиеләр саны 117 берәмлек тәшкил итә, аларда 7548 хезмәткәр эшли, шуларның 7206сы яки 96,6 проценты – профсоюз әгъзалары.

Узган ел совет тарафыннан 18 утырыш үткәрелгән, шул исәптән 14е – күчмә утырыш. Мәгариф учреждениеләренең уку елына, авыл хуҗалыгы предприятиеләренең язгы кыр эшләренә әзерлеген тикшерү, төзелеш объектларында хезмәтне саклау кагыйдәләрен үтәү эшчәнлекнең чорга һәм тармакка бәйле өстенлекле юнәлешләреннән санала.

2021 ел дәвамында хезмәт хакы буенча бурычларны киметү мәсьәләсе буенча 7 бурычлы предприятие эше каралган. Комиссия һәм эш бирүчеләрнең оператив хезмәттәшлеге нәтиҗәсендә 50 хезмәткәр алдында 1,2 миллион сум күләмендә бурыч түләнгән.

Хезмәт хакын минималь хезмәт хакы дәрәҗәсеннән түбәнрәк түләүгә юл куймау мәсьәләсе буенча комиссия тарафыннан 71 эш бирүче тыңланган һәм каралган, 13ендә бозулар ачыкланган. Кагыйдә бозулар ачыкланган предприятиеләр тарафыннан комиссия эше нәтиҗәсендә 71 хезмәткәргә 417 мең сум күләмендә хезмәт хакына өстәп түләү башкарылган.

Бәрәңге чәчү мәйданнары арттырылачак

Агросәнәгать комплексында эшләрнең торышы турында авыл хуҗалыгы һәм азык-төлек идарәсе башлыгы Александр Ромадановский сөйләде. Ел башыннан район хуҗалыкларында 633 тонна сөт савылган. 587 тонна сөт сатылган, уртача сатып алу бәясе бер килограмм өчен 31 сум тәшкил иткән.

Язгы кыр эшләренә актив әзерлек бара. Быелга чәчү мәйданнары структурасы билгеләнгән. Алар 2021 ел дәрәҗәсендә сакланачак, ягъни 100 мең гектардан артык. Бөртекле һәм бөртекле-кузаклы культуралар 55 мең гектар мәйданда чәчеләчәк, техник культуралар – 26 мең гектардан артык мәйданны, азык культуралар 19 мең гектарны биләп алачак. Узган ел яшелчәләргә кытлык булганлыктан, агымдагы елда бәрәңгегә мәйданны шактый арттыру планлаштырыла, ул 215 гектар тәшкил итәчәк.

Шәһәрдә кеше үтерелгән

Оператив хәл турында Россия Эчке эшләр министрлыгының Чистай районы буенча бүлеге башлыгы урынбасары Сергей Атуров хәбәр итте. Җинаятьләр турында барлыгы 8 хәбәр кергән. Сводкада – кеше үтерү, 4 урлашу, 2 мошенниклык, наркотикларны тартып алу очрагы. Юл хәрәкәте кагыйдәләрен бозган өчен 267 кеше тоткарланган. 6 машина йөртүче руль артына исерек килеш утырган. 25 юл-транспорт вакыйгасы килеп чыккан, аларда 2 кеше төрле дәрәҗәдәге имгәнүләр алган. Җәяүлене бәрдергәннәр. 4 машина йөртүче юл-транспорт вакыйгасы урыныннан качкан.

Административ хокук бозулар кылган 340 кеше тоткарланган, аерым алганда, җәмәгать урынында исерек хәлдә күренгән өчен – 11.

Госпитальдә 20 кеше дәвалана, шуларның 11е – чистайлы

Соңыннан Дмитрий Алексеевич, гадәттәгечә, коронавируска бәйле вәзгыять һәм районда вакцинация барышы белән кызыксынды. Чистай үзәк район дәваханәсенең баш табибы Рәис Мостафин хәбәр иткәнчә, коронавируска бәйле хәл тыныч. Хәзерге вакытта госпитальдә 20 кеше дәвалана, шуларның 11е – чистайлы.

10 бәйрәм көнендә 52 кеше прививка ясаткан. Хәзерге вакытта районда вакцинация буенча план 80 процентка үтәлгән.

Мондый вакцинация темплары пандемияне туктату өчен кирәкле күмәк иммунитетка ирешергә әлегә мөмкинлек бирми, дип ассызыклады башлык. Ул җаваплы хезмәткәрләргә әлеге мәсьәләне халык белән җентекләп эшләргә кушты.