Чистай-информ
  • Рус Тат
  • Без барысы өчен дә сезгә рәхмәтлебез…

    Чулман яр буе зонасы буенда урнашкан һәм аның матурлыгының бер өлешенә әверелгән шәһәребезгә нигез салучылар нинди зирәк, талантлы булганнар. Алар шәһәребезнең йөзек кашы булган яшел аллеялы киң урамнарны, мәһабәт гыйбадәтханәләрне, матур йортларны мирас итеп калдырганнар.

    Биредә борынгы һәйкәлләр, мәдәнияттә, мәгарифтә бай горефгадәтләр саклану мисаллары да аз түгел. Яңартылган борынгы бинада, җәелеп үскән тирәкләр күләгәсендә урнашкан 1нче номерлы лицей – яңадан торгызылган уку комплексы эше бу яктан аеруча игътибарга лаек.

    Бүгенге көндә тимердән челтәрләп эшләнгән яңа керү капкалары, эскәмияләр, уңайлы эчке ишегалды ни дәрәҗәдә гармонияле күренә.

    Директор Гөлнур Габитова, барлык үзгәртеп коруларга рухландыручы, оештыручы буларак, аның тышкы һәм эчке бизәлешен безгә шулкадәр яратып сөйләде һәм күрсәтте.

    Нигез салынганнан бирле, 13 елдан артык, ул лицей коллективын җитәкли. Республика, шәһәр хакимиятенең матди ярдәме белән ул тузган бинага капиталь ремонт үткәрә, елдан-ел матди базаны яңарта һәм ныгыта.

    – Лаеклы ялда булганнар безнең ишегалдында ял итәргә һәм чәчәкләрдән ләззәт алырга яраталар, – ди елмаеп ул. – Матурлык, уңайлылык, тәртип – төп тәрбиячеләребез, алар укучыларыбызга файдага гына.

    Яңа уку елына һәр бүлмә, интерактив такталар, заманча приборлар, җиһаз белән җиһазландырылган һәр сыйныф җентекләп әзерләнгән. Иркен коридорлар, фойе, спорт залы, спорт мәйданчыгы күз явын алырлык.

    – Биредә барлык күрсәткечләр буенча бик яхшы әзерләнгәннәр, – ди мәгариф идарәсе начальнигы Ольга Купцова, – һәр нәрсәдә тәҗрибәле һәм җаваплы җитәкче Гөлнур Салих кызының кулы сизелә. Киләчәккә ышаныч, өмет уятучы шундый коллективлар өчен шатлык һәм горурлык хисләре кичерәм. Лицейдагы кебек үк, уку йортлары урнашкан борынгы биналарны сакларга тырышабыз. Аларны саклауга, янгын куркынычсызлыгын көчәйтүгә аерым игътибар бирәбез.

    Үзен яхшы яктан күрсәткән лицейның үзенчәлеге шунда: балалар бирегә беренче сыйныфка түгел, ә конкурс нигезендә башка мәктәпләрдән бишенче сыйныфларга җыела. Соңгы елларда биредә уртача 400гә якын бала шөгыльләнә. Быел укуны 61 укучы тәмамлаган, шуларның өчтән бере – медалистлар. Барысы да диярлек Казан, Мәскәү һәм башка югары уку йортларына укырга кергәннәр һәм үз лицейларына рәхмәт әйтергә киләләр.

    Директор бүлмәсендә без алтын медаль белән укуны тәмамлаган, медицина университетына уңышлы укырга кергән сөйкемле кызлар Анастасия Иванова һәм Татьяна Чугунованы очраттык. БДИ тапшырганда икесе дә рус теле һәм химия буенча 100 балл җыйган. Сүз уңаеннан, лицейда бу системаны гамәлгә керткәннән соң уннан артыграк бала шундый югары дәрәҗәгә ирешкән һәм биредә барлык фәннәр буенча уртача балл республика һәм федераль күрсәткечләрдән югарырак.

    – Ныклы белем биргәннәре, әниләргә хас булганча кайгыртканнары өчен кадерле педагогларыбызга, иң яхшы, бәхетле елларыбыз узган, җылы мохит тудырган күңелгә якын лицеебызга чын күңелдән рәхмәт, – дип бертавыштан әйттеләр кызлар.

    – Олы тормышка кыю аяк баскан шундый искиткеч чыгарылыш укучыларыбыз белән горурланмыйча мөмкин түгел, – дип билгеләп үтте лицейның директор урынбасары Татьяна Сахарова. – Чыгарылыш сыйныф укучыларыбыз, хәзер инде студентлар Мария Сафиуллина, Александр Ким, Алинә Ихсанова, Анастасия Сарыкова һәм башкалар үзләренең шатлыклары белән уртаклаштылар.

    Югары һөнәри осталыкка ия педагоглардан торган коллектив ныклы белемнең ышанычлы нигезен сала. Аларның барысы да беренче һәм югары квалификация категорияләренә ия, төрле грантлар, конкурслар җиңүчеләре булып торалар.

    – Заманча мәгълүмати, исәпләү техникасы белән коралланган сәләтле балалар белән эшләү, аларга белем бирү җиңел түгел, – дип уртаклаша яшь талантлы математик, «Ел укытучысы» республика конкурсында җиңүче Александра Евсеева. – Белемнәрне даими рәвештә тулыландырырга кирәк. Еш кына квалификация күтәрү буенча республика курсларында шөгыльләнәбез, Мәскәүдә, Санкт-Петербургта, шулай ук Англия, Германиядә һәм башка илләрдә стажировка узабыз.

    Лицейның казанышлары һәм ирешкән дәрәҗәләре санап бетергесез. Соңгы елларда ул шәһәр һәм районның иң яхшы белем бирү учреждениесе булып тора, «ТРның иң яхшы 100 мәктәбе» рейтингында лаеклы урын алып тора, «XXI гасыр мәгариф оешмалары» Бөтенроссия конкурсында лауреат, «Киләчәк интеллекты» халыкара конкурсында җиңүче, «Татарстан Республикасында уңышлы мәктәп» грантына ия. Лицей укучылары фән конкурсларында, төрле олимпиадаларда җиңүләр саны буенча даими рәвештә беренче урынны алып торалар.

    Укытучылар кадрларын яшьләр белән тулыландыру турында сүз кузгаткач, безнең әңгәмәбез бераз моңсу төсмер алды. Әгәр бу мәсьәлә лицейда ставкаларны берләштерү, йөкләнешне арттыру белән ничек тә булса хәл ителсә, кайбер башка уку йортларында бу резерв та сарыф ителгән. Ел саен шәһәр һәм районга санаулы педагог кайтканда, кадрлар мәсьәләсен ничек хәл итәргә, бу хәтта бер мәктәп өчен дә сизелми.

    – Мин пединститутны тәмамладым, – дип билгеләп үтте ТРның атказанган укытучысы Ольга Позмогова, – соңгы елларда ул дәресне алып бару, укучылар белән эшләү методикасына ия булган, мәктәпләр өчен белгечләр – фән укытучылары түгел, ә шәһәрләрдә төпләнүче һәм районнарга барырга ашыкмаган химиклар, физиклар чыгаручы КФУның филиалы булды. Педагогларны әзерләү һәм урыннарга җибәрү системасының бозылуы кадрлар җитмәүгә китерде һәм әлеге мөһим проблема тиз арада хәл итүне таләп итә.

     Күптән түгел Белем көне булып узды, лицей укучылары үз остазлары белән очраштылар, беренче тапкыр лицей бусагасын бишенче сыйныф укучылары дулкынланып атлап керделәр. Белем дөньясына ак юллар сезгә, кадерле малайлар һәм кызлар, алда сезне яңа ачышлар, якты җиңүләр һәм саллы казанышлар көтсен!

    Нравится
    Поделиться:
    Реклама
    Комментарии (0)
    Осталось символов: