Балалар сәнгать мәктәбендә өй туе

Балалар яңартылган бина бусагасын 9 ноябрьдә атлап керделәр, мәктәптә дәресләр башланды. Белем алу өчен яңа мөмкинлекләр 151 укучы һәм 7 укытучы өчен ачылды.

Ремонт эшләре 8 ай дәвам итте. Шушы вакыт эчендә төзүчеләр түбәне ремонтладылар, ишекләрне һәм тәрәзәләрне алыштырдылар, цоколь катын җылыттылар, электр үткәргечләр суздылар, нигезгә гидроизоляция ясадылар. Бинада шулай ук эчке бизәкләү эшләре тәмамланды. Дәресләр уза торган бүлмәләрдә җылы идәннәр җәелде, – ди район башкарма комитеты җитәкчесенең инфраструктура үсеше буенча урынбасары Павел Емельянов.

Сәнгать мәктәбендә ремонт ясау нәтиҗәсендә ике өстәмә укыту сыйныфы һәм методик материаллар саклау өчен урын барлыкка килгән. Димәк, урын күбәйгән. Борчыган башка проб­леманы да хәл иткәннәр. Элек дымлылык аркасында бина диварларында күгәрек барлыкка килә торган булган. Хәзер бинада коры.

Капиталь ремонт шулай ук укыту сыйныфы булган күргәзмә залына да кагылган. Биредә түшәмнәр аскарак төшерелгән, аның каравы, бинада дәресләр үткәрү өчен хәзер күпкә яктырак һәм уңайлырак.

Укытучылар мондый үзгәрешне түземсезлек белән көтте. Барыннан да элек алар яхшы яктыртылган, җылы бинада рәсем ясый алачак укучылары өчен шат. Хәзер түбәдән су акмый, димәк, аларны эштән берни дә туктатып тора алмый.

Миңа мәктәптә диварларның хәзерге төсе ошый. Элек алар төрле төстә һәм картиналар белән кушылып китә иде. Хәер, интерьердагы артык ачык буяулар игътибарны юнәлтергә ирек бирми иде. Хәзер безнең аудиториядә нейтраль төсләр хөкем сөрә, кагыйдәләр буенча шулай булырга тиеш тә. Күргәзмә залында диварлардагы картиналар яңа буяулар белән уйный башладылар. Яңа диварлар фонында яңа җиһазлар куелуын телим, – дип билгеләп үтте сәнгать мәктәбе укытучысы Наталья Песчанова.

Укучылар үз мәктәпләренә кайтуларына бик шат. Унике яшьлек Раминә яңа урынны өйрәнә. Ремонт вакытында ул уку процессын өзми. Бер төркем балалар «Восток» мәдәниял итү үзәге, музей-күргәзмә комплексы һәм елгачылар клубы мәйданнарында шөгыльләнгәннәр.

 Без сәнгать мәктәбе ачылуын зарыгып көттек. Кунакта яхшы булса да, өйдә яхшырак диләр бит. Үз сыйныфымны сагындым, элек анда яхшы ремонт булмаса да, туган диварларны берни дә алыштыра алмый. Хәзер биредә күп нәрсә уңай якка үзгәрде. Бик җылы, чиста һәм якты. Бердәнбер борчыган нәрсә, мәктәп янында машина кую өчен урын юк. Балаларны мәктәпкә алып килүче әти-әниләр дә моны билгеләп үтәләр, – дип фикерләре белән уртаклашты укучы Раминә Хәйруллина.

Хәзер яшь рәссамнар яңа сыйныфларга ияләнәләр. Рәсем сәнгатен, рәсем ясау осталыгын, төсләрне, станок һәм кулланма композицияләрне, әвәләү, скульптура, сәнгать тарихын өйрәнүләрен дәвам итәләр. Хәзер аларның бурычы – яңа диварларны яңа иҗади эшләр белән бизәү.

Яшь рәссамнарга һәрвакыт илһам дулкынында булуларын телибез. Яңартылган уку урыны яңа уңыш сәхифәсен ачсын һәм зурдан-зур уңышларга илтсен.