Чистай-информ
  • Рус Тат
  • Балалар бакчасына йөрүчеләр имтихан тапшырдылар

    Балалар катнашында булган теләсә нинди юл-транспорт вакыйгасын гадәттән тыш дип кабул итәргә кирәк.

    Ике ай эчендә шәһәр һәм район юлларында 7 авария булды, аларда 1 баланың гомере өзелде, ә 10 бала тән җәрәхәтләрен алды. Балаларга юл йөрү кагыйдәләрен өйрәтү үз актуальлеген югалтмый.

    Мәктәпкәчә белем бирү учреждениеләрендә тәрбияләнүчеләр арасында үткән “Юл мозаикасы” дип исемләнгән муниципаль конкурс-фестиваль быел бишенче тапкыр үткәрелде.

     Бу ЮХИДИ хезмәткәрләре, «Юл хәрәкәте иминлеге» дәүләт бюджет учреждениесенең мәгариф бүлеге белән берлектә үткәргән чараларының берсе. Ул яшь чистайлыларга юл йөрү кагыйдәләрен ныгытуга, юл-транспорт имгәнүләрен кисәтүгә юнәлдерелгән.

    Сайлап алу турында 22 команда финалга чыгу өчен көч сынашты. 2нче, 4нче, 6нчы, 14нче, 17нче, 23нче номерлы балалар бакчаларында тәрбияләнүчеләр финалга чыгу бәхетенә ирештеләр. Билгеле, алар, ныклы чыныгу үттеләр, әмма бирелгән сынаулар да җиңелләрдән түгел иде! Балаларга җиңел булмады, әмма алар югалып калмадылар.

    «Юл фәннәрен белүчеләр», «Юл ребусы», «Игътибар: юл», «Юл билгеләрен белүчеләр», «Нинди юл билгесе артык?» станцияләрендә катнашучылар юл вәзгыятен ни дәрәҗәдә бәяли белүләрен, куелган кагыйдәләр турында ни дәрәҗәдә мәгълүматлы булуларын күрсәттеләр. Велосипедны фигуралы йөртүдә малайлар катнашты, ә кызлар аларга көч биреп тордылар. «Паша, Егор, биршмәгәгез!» дип кычкырулары малайларны дәртләндерде.

    Конкурс биремнәрен үтәгәннән соң балалар 20нче номерлы балалар бакчасының музыкаль залына җыелдылар. Алда – конкурсның фестиваль өлеше. «Барыбыз да юл йөрү кагыйдәләре иминлеге өчен» дип исемләнгән әлеге фестиваль бик матур, сәхнәләштерелеп үткәрелде. Үз тәрбиячеләрен, йомгаклау чыгышы алдыннан тәрбиячеләренең соңгы үгет- нәсыйхәтләрен бик җентекләп тыңлаучы балалар янына киләм.

    – Бу Егор, Ксюша, Илья, – дип капитан хокукында Вика үз командасының әгъзалары белән таныштыра (редакциядән. Алар барысы да бик яхшы чыгыш ясадылар). Һәм өстәргә ашыга: – Алар сынатмадылар!

    – Балалар юл йөрү вәзгыятен күзәтә һәм дөрес бәя бирсеннәр өчен аларга даими рәвештә урамнарда үзеңне имин тоту күнекмәләрен төшендерергә тырышабыз, юл кагыйдәләре буенча дәресләр үткәрәбез, – диләр педагоглар Алина Пестрова һәм Алина Шәрифуллина. – Ә «Юл мозаикасы» конкурсына әзерләнгәндә без алган белемнәрен камилләштерү өстендә эшләдек.

    Фестивальдә катнашучылар­ның икенчеләре исә һәрвакыт кагыйдәләрне үтәүләрен күрсәттеләр. Алар машинада барганда әти-әниләре аларны һәрчак автокреслога утырталар, велосипедта исә гел куркынычсыз урыннарда өлкәннәр күзәтүе астында гына йөриләр.

    Чыгыш ясау вакытында балалар уен формасында юлларда имин йөрү кагыйдәләрен искә төшерделәр. Алар аеруча җәяүлеләрнең йөрү кагыйдәләрен ныгытуга игътибар иттеләр, шулай ук киемнәрдә яктылык кайтаручы элементларны файдаланып, юл билгеләрен яхшы белүләрен күрсәттеләр. Бу аеруча сөендерә.

    – Әйтергә кирәк, кисәтү эшләре барлык шәһәр һәм район учреждениеләрендә үткәрелә, – дип ассызыклый «Юл хәрәкәте иминлеге» дәүләт бюджет учреждениесе бүлеге начальнигы Светлана Сидорова. – Моның өчен педагог­ларга зур рәхмәт! Әтиләр һәм әниләр балаларына көн саен юл йөрү кагыйдәләрен үтәргә кирәклеген исләренә төшереп торсыннар, кагыйдәләрне үзләштерергә булышсыннар, юлларда ориентлашырга өйрәтсеннәр иде. Үзара тыгыз хәрәкәттә генә без балаларда юлларда имин йөрү нигезләрен төшендерә алачакбыз.

     Иң мөһиме, әти-әниләр үз балаларына үрнәк булсыннар иде, уйланылмаган адымнар бар тырышлыкларын да юкка чыгарырга мөмкин. Әгәр дә әти-әниләр балалары күз алдында светофорның кисәтүче сигналына игътибар итмичә юл аша яисә тиешсез урында йөгереп чыгалар икән, аларның балалары да шулай эшләмәс дип кем ышанып әйтә ала?

    – Бу конкурста 4нче балалар бакчасы командасы составында минем кызым Арина да катнашты, – дип сөйли Наталья Миронова. – Балалар бакчасы тәрбиячесе Анастасия Геннадьевна Давыдова юл йөрү кагыйдәләрен өйрәтүгә зур игътибар бирә. Тәрбияләнүчеләр белән бергәләп алар юл билгеләрен, светофор сигналларын, җәяүлеләр чыгу урыннарын һәм алар аша дөрес чыгу кагыйдәләрен өйрәнәләр. Үз чиратыбызда без дә кызым белән бакчага барганда кагыйдәләрне гел искә төшереп торабыз, имин маршрут сайларга тырышабыз, юл билгеләренең мәгънәләре турында сөйләшәбез. Сентябрьдә Арина 1 сыйныфка бара, без уку йортына кадәр юл торышын өйрәнәбез.

    «Юл мозаикасы» конкурс- фестивалендә беренче урынны жюри 14нче номерлы балалар бакчасына, икенче урынны минем яңа танышларыма - 6нчы номерлы балалар бакчасына, өченче урынны 23нче номерлы балалар бакчасына бирде. Сүз уңаеннан, катнашучыларга барысына да бүләкләр бирелде, беркем дә призсыз калмады. Барысы да булдырды! Бүләкләр дә менә дигән иде. Ә иң мөһиме – бу юл хәрәкәтендә бәләкәй катнашучыларыбыз турында кайгыртучанлык күрсәтү!

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: