Чистай-информ
  • Рус Тат
  • Авылларның көнүзәк мәсьәләләре турында фикер алыштылар

    Ел саен район җитәкчелеге шәһәрнең хезмәт коллективлары һәм авыл җирлекләрендә яшәүчеләр белән очраша. Шундый очрашуларның берсе Гаделша авыл җирлегендә аның составына кергән Гаделша, Чирүле Шонталысы, Дүрт-Өйле халкы белән булды. Аны Чистай муниципаль районы башлыгының беренче урынбасары Константин Иванов алып барды.

    Авыл җирлеге башлыгы Илшат Нуретдинов җирлек составына кергән торак пунктларның казанышлары һәм тормышы турында сөйләде. Барлыгы 805,6 гектар мәйданда 700дән артык кеше яши. Авыл җирлеге территориясендә барлыгы 272 шәхси ярдәмче хуҗалык бар.

    Илшат Әнвәр улы презентация ярдәмендә мәктәпкәчә учреждение эше турында сөйләде.

    – Балалар бакчасы төзекләндерелде: салкын, кайнар су, канализация, янгын сигнализациясе, видеокүзәтү бар. Бинаның гомуми мәйданы 472 квадрат метр тәшкил итә. Балалар бакчасы заманча, психологик-педагогик, медицина, санитар-эпидемиология, янгын куркынычсызлыгы таләпләренә җавап бирә, – дип билгеләп үтте авыл җирлеге башлыгы. Илшат Әнвәр улы Бөек Җиңүнең 75 еллыгын бәйрәм итү елында башкарылган эшләр турында да сөйләде. Ветераннарның берсе дә игътибарсыз калмаган.

    Муниципаль район башлыгының беренче урынбасары үз чыгышын бөтен дөньяга кагылган темадан башлады.

    – Узган ел җиңел булмады. Коронавирус пандемиясе безнең тормышыбызга билгеле бер төзәтмәләр кертте. Карантин чаралары һәм икътисадны алга таба үстерү өчен шартлар саклап калу арасындагы алтын урталыкка ирешү катлаулы бурыч булды. Чистайда пандемия чорында 2нче шәһәр дәваханәсе базасында вакытлыча йогышлы авырулар госпитале ачылды, анда Кама аръягы зонасы районнары халкы өчен 129 урын булдырылды, – диде Константин Валентинович.

    Спикер муниципалитет бюджетыннан госпитальне җиһазландыру һәм безнең шәһәргә башка районнардан килгән медицина хезмәт­кәрләре өчен тулай торакта бүлмәләрне төзекләндерүгә 2,5 миллион сум бүлеп бирелүен ассызыклады. Дәвалау учреждениеләре транспорт белән тәэмин ителгән. 2020 елда госпитальдә 1375 пациент медицина ярдәме алган, шуларның 490ы – чистайлы.

    Гражданнар җыенында шулай ук капиталь ремонт темасын да кузгаттылар. Ул 8 күпфатирлы йортта, шул исәптән Иске Роман авыл җирлегенең 1 күпфатирлы йортында үткәрелгән. Акбулат, Яуширмә авылларында чиста су белән тәэмин итү программасы тормышка ашырылган, Чистай Выселкасы авылында да эш башланган. Анда суэтем башнясы куелган.

    – Үзара салым буенча җыеннар оешкан төстә уза. Әлеге программа буенча авыл эчендәге юллар төзекләндерелә, су белән тәэмин итү челтәрләрен төзү һәм ремонтлау башкарыла, зиратлар тәртипкә китерелә, балалар мәйданчыклары һәм парклар төзекләндерелә, ә акчаның берникадәр өлеше урам утларын карап тотуга тотыла, – дип өстәде Константин Иванов.

    Авыл хуҗалыгын үстерү турында да сөйләштеләр. Шулай, Чистай районы территориясендә 85 крестьян (фермер) хуҗалыгы үз эшчәнлеген алып бара, шуларның 4се 2020 елда ачылган. Хуҗалыкларда ел башында мөгезле эре терлекнең баш саны 253 башка, сөт җитештерү 28 процентка арткан. Бу «Яңа эш башлаучы фермер» һәм «Агростартап» программалары буенча дәүләт ярдәме ярдәмендә мөмкин булган.

    Халык җыеннары дәвам итәчәк. Бирелгән барлык сораулар тикшереләчәк.

     

    Район тормышына кагылышлы иң мөһим яңалыкларыбызны «Чистополь-информ» Telegram-каналыбызда да укыгыз

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: