Акча эшләргә теләгән, әмма акчасыз калган

Шәһәрдә яшәүче 28 яшьлек хатын-кыз акча эшләргә теләп, 89 200 сумнан колак каккан. Гариза белән ул полициягә мөрәҗәгать иткән. Бу хакта Россия Эчке эшләр министрлыгының Чистай районы буенча бүлегендә хәбәр иттеләр.
Полиция хезмәткәрләре мессенджерда яшь кызга таныш булмаган хатын-кызның язганлыгын ачыклаган, ул керем алу ысулын тәкъдим иткән. Таныш булмаган хатын-кыз маркетплейс­та билгеле бер сатучыларның товарларның статистикасын күтәрү өчен, аларга «лайк»лар куярга һәм аларның һәрберсе өчен аңа түләячәкләрен әйткән.
— Алга таба аралашу барышында әңгәмәдәш тагын да күбрәк акча эшләргә: товарларга ялган заказ бирергә тәкъдим иткән. Моның өчен билгеле бер позицияләрнең бәясен күр­сәтелгән реквизитлар буенча күчерергә кирәк була. Товарны сатып алучы үзе алмаячак, аның каравы процент белән акча счетка кайтарылачак. Чистайда яшәүче берничә «сатып алу» ясаган, акчаны кемнеңдер банк карталарына күчергән. Ләкин акчаны да, бәядән вәгъдә ителгән процентларны да аңа беркем дә кайтармаган. Хәер, сайт үзе дә ялган булып чыга, — дип сөйләделәр Эчке эшләр министрлыгы бүлеге матбугат хезмәтендә.
Әлеге очрак буенча «Мошенниклык» маддәсе буенча җинаять эше кузгатылган, әңгәмәдәшнең шәхесе һәм акча алучылар ачык­лана.