Чистай-информ
  • Рус Тат
  • Чистайлыларга киңәш: товарны кире кайтару яки алыштыру өчен, аның товар төсен саклап калу зарур

    Нинди дә булса сәбәпләр аркасында туры килмәгән, азык-төлек категориясенә кермәгән товарны алыштырып буламы?

    Татарстан Республикасының Чистай территориаль органына шәһәрдә яшәүчеләр төрле сораулар белән мөрәҗәгать итәләр, аларга җаваплар кулланучылар хокукларын яклау буенча законнарда каралган.

    Эчке базарны үстерү һәм координацияләү бүлеге начальнигы Светлана Саломеева белән әңгәмә корып, без теге яки бу сәбәпләр буенча кулланучыларга туры килмәгән тиешле сыйфаттагы товарлар сатып алу белән бәйле мәсьәләләр буенча фикер алыштык.

    – Нинди дә булса сәбәпләр аркасында туры килмәгән, азык-төлек категориясенә кермәгән товарны алыштырып буламы?

    – «Кулланучылар хокукларын яклау турында»гы закон кулланучыга азык-төлек категориясенә кермәгән, тиешле сыйфаттагы, әмма формасы, үлчәмнәре, фасоны, төсе, габаритлары яки комплектациясе буенча туры килмәгән товарны сатучыда шуңа охшаш товарга алыштыру мөмкинлеге бирә. Товарны сатып алган көнне санамыйча, ундүрт көн эчендә алыштырырга мөмкин. Бер шарты бар – әлеге товар файдаланылмаган булсын, аның товар төсе, куллану сыйфатлары, пломба, фабрика ярлыгы, шулай ук товар яки касса чегы яки түләүне раслаучы башка документы сакланган булырга тиеш.

    Сатучы үлчәме буенча туры килмәгән аяк киемен алыштырудан баш тарта, чөнки ул 50 процент ташлама белән сатып алынган иде. Ул аяк киеме киметелгән бәядән сатылды, шуңа күрә кире кайтарыла һәм алыштырыла алмый, ди. Сатучы хаклымы?

    – Сатучы товарга бәяне мөстәкыйль билгели. Киметелгән бәядән товар сату теләсә ничек аталырга мөмкин – ташлама, акция. Закон күзлегеннән караганда, товарның нинди бәягә, акция яки ташлама буенча сатып алынуы бернинди әһәмияткә ия түгел. Барлык очракларда да товарга «Кулланучылар хокукларын яклау буенча» РФ Законының барлык нигезләмәләре, шул исәптән 14 көн эчендә кайтару мөмкинлеге гамәлдә, әгәр товар файдаланылмаса һәм аның товар төсе сакланган булса.

    Сатучыга азык-төлек катего­риясенә кермәгән, тиешле сыйфаттагы товарны алыштыру турындагы таләп белән мөрәҗәгать иткән көнне сатуда яраклы товар булмаса, нишләргә?

    – Кулланучы сатып алу-сату килешүе үтәүдән баш тартырга һәм күрсәтелгән товар өчен түләнгән акчаны кире кайтаруны таләп итәргә хокуклы. Әлеге таләп күрсәтелгән товарны кире кайтару көненнән соң өч көн эчендә канәгатьләндерелергә тиеш. Яклар килешенүе буенча товарны алыштыру сатуга шундый товар кайткач башкарылырга мөмкин.

    Кулланышта булмаган барлык азык-төлек категориясенә кермәгән товарларны да алыштырырга мөмкинме?

    – Шундый ук, әмма башка үлчәмдәге, формадагы, габариттагы, фасондагы, төстәге яки комплектациядәге алыштырыла яки кире кайтарыла алмый торган товарлар исемлеге расланган. Мәсәлән, анда өй шартларында авыруларны кисәтү һәм дәвалау товарлары, дару препаратлары, шәхси гигиена, тукыма әйберләр, кабель продукциясе, төзелеш һәм бизәкләү материаллары һәм метрлар белән үлчәнгән башка товарлар; трикотаж әйберләр, полимер материаллардан тулысынча яки өлешчә ясалган һәм азык-төлек товарлары белән контакт­ка керүче әйберләр һәм материаллар, көнкүреш химиясе товарлары, пестицидлар һәм агрохимикатлар, көнкүреш җиһазы, кыйммәтле металлардан һәм ташлардан ясалган ювелир әйберләр; автомобильләр һәм мотовелотоварлар, гарантия срок­лары билгеләнгән техник катлаулы көнкүреш билгеләнешендәге товарлар, гражданнар коралы, хайваннар һәм үсемлекләр, периодик булмаган басмалар керә.

    – Интернет кибеттә сатып алынган тиешле сыйфаттагы товардан баш тартып буламы? Булган очракта нинди вакыт аралыгында моны эшләргә кирәк?

    – Интернет кибеттә товар сатып алу товар сатуның дистанцион ысулы булып тора. Закон буенча кулланучы товарны алганчы аннан теләсә кайсы вакытта баш тарта ала, ә товарны алгач – 7 көн эчендә. Тиешле сыйфаттагы товарны кире кайтару тәртибе һәм сроклары турында мәгълүмат товарны китергәндә язмача формада тәкъдим ителгән булмаса, кулланучы товар китерелгәннән соң өч ай эчендә аннан баш тарта ала.

    – Дистанцион ысул белән сатып алынган тиешле сыйфаттагы товар өчен акчаны нинди срокта кайтарырга тиешләр?

    – Товардан баш тарткан очракта, сатучы кулланучыга килешү буенча түләнгән акчаны кулланучы тарафыннан тиешле таләп куелган көннән башлап, кулланучыдан кире кайтарылган товарны китереп бирүгә чыгымнардан кала, 10 көннән дә соңга калмыйча кайтарырга тиеш.

    Нравится
    Поделиться:
    Реклама
    Комментарии (0)
    Осталось символов: